Að stækka og stækka og stækka svo meira

Á síðasta ári fór fram kosning í Hafnarfirði um stækkun álversins í Straumsvík. Þá var deiliskipulags-tillaga um stækkun álvers felld í íbúakosningu.

Aðeins fáum dögum eftir kosninguna fóru á kreik sögur og jafnvel yfirlýsingar um hvernig hægt væri að koma sér hjá því að lúta niðurstöðunni og stækka samt. Mýmargar hugmyndir um hvernig hægt væri að fara á svig við lýðræðið komu þá fram, meira að segja úr munni "fulltrúa lýðræðisins". 

Meirihluti bæjarstjórnar Hafnarfjarðar þar sem Samfylkingin fer með völd hafði lýst yfir hlutleysi sínu í málinu eða neitað að tjá afstöðu sína, slíkt væri leyndó. Allir sem fylgdust grannt með vissu þó að slíkt var sýndarmennskan ein, bæjarstjórnin var langt frá því að vera hlutlaus - mjög langt. 

Nú er komið á daginn að álverið er einmitt samt að stækka. Vissulega ekki jafn mikið og þá var ráð fyrir gert, og vissulega ekki með sama hætti, en það stækkar samt. Þeir sem halda að nú sé stækkun lokið eru að láta sig dreyma, þetta er smjörþefurinn af því sem koma skal. Þessi bisness er einfaldlega þannig, ekki af illgirni heldur í eðli sínu - hann verður að stækka.

Hvaðan kemur orkan þegar álverin öll í hverju landshorni stækka? Erum við Íslendingar svo fullkomlega skyni skroppin að ætla að festa orkuauðlindir okkar í fleiri stækkandi álverum?

Þegar væntanlegt álver í Helguvík stækkar og væntanlegt álver á Bakka stækkar og... þegar allt hitt sem fyrir er stækkar og stækkar (ellegar hótar því að fara, eins og alltaf er gert), hvað þá?

Gjörðir hafa afleiðingar. Ef fólk hefur ekki hæfileika til að hugsa fram í tímann heldur festir sig í skammtíma-reddingum þá á það yfirleitt ekki að koma nálægt stórum ákvörðunum. Í upphafi skyldi endinn skoða... er ekki málið einmitt að læra það núna, í einmitt þessu árferði?

Athugasemdir

[Sigurður Sigurðsson, 18.9.2008 kl. 22:21]

Álverin í öllum fjörðum
inni á hverju engi.
Afleiðing af okkar gjörðum
eflaust varir lengi.

[Tryggvi L. Skjaldarson, 19.9.2008 kl. 18:23]

Stækkunin sem þú nefnir hefur ekkert með íbúakosninguna um deiliskipulagið að gera.

Kerskálarnir og kerin verða þau sömu.  Rafmagnsleiðarar í tveimur kerskálum af þremur verða endurbættir og með hærri straum sem hægt verður að keyra í gegn um kerin eykst framleiðslugetan um 40.000. tonn.  Þetta var hægt að gera vegna þess að það tókst að semja um rafmagn fyrir álverið nú í sumar.

Þessi niðurstaða lá ekki fyrir þegar kosið var um deiliskipulagið

Þegar kosið var um deiliskipulagið var álverið í Straumsvík í eigu Alcan.

Þegar ákveðið var að fara þessa leið til að auka framleiðslu var álverið komið í eigu Rio Tinto.  Tvö að skilin mál og tvær að skildar ákvarðanir.

Niðurstaðan  og sigur andstæðinga stækkunar í Straumsvík er  að Hafnarfjarðarbær missir  af milljörðum á milljarða ofan í tekjur á næstu áratugum og nokkur hundruð góð störf verða ekki til.

Spurning hvort ekki ætti að kjósa aftur um deiliskipulagið í næstu sveitarstjórnarkosningum enda munaði aðeins að 45 manns hefðu sagt já í staðinn fyrir nei. 

Það er líka að renna upp fyrir fólki hvernig varanleg verðmæti verða til.