Guðinn heitir græðgi: Frábært viðtal í Mogga í dag

Í Mogganum í dag er að finna frábært viðtal Kolbrúnar Bergþórsdóttur við Ögmund Jónasson. Mæli eindregið með lestri!

Viðtalið er ítarlegt og kemur víða við. Efnahagsmálin, bankarnir, evran, NATÓ, virkjanir, misskipting, stjórnarandstaða, upplýst umræða og öflugt samfélag er meðal þess fjölmarga sem er rætt....

Ögmundur segir meðal annars:

Óheft markaðshyggja hefur umbreytt íslensku samfélagi í spilavíti. Við blasir þjóðfélag aukinnar misskiptingar, sennilega meiri en dæmi eru um áður í Íslandssögunni. Þegar menn tala um það í fullri alvöru að fara með heilbrigðsþjónustuna og orkukerfið, innviði samfélagins, út á þetta sama markaðstorg þar sem mönnum hefur mistekst jafn herfilega og dæmin sanna þá hlýtur maður að vara við því. Ég vil að sjálfsögðu blandað hagkerfi þar sem markaðurinn spreytir sig og samkeppni þar sem það á við, en samfélagsþjónustunni, innviðum samfélagsins, vil ég halda hjá samfélaginu...

...Mér finnst ekki vera sáluhjálparatriði að bankar séu í eigu hins opinbera og ég legg ekki að jöfnu bankana annars vegar og heilbrigðisþjónustuna hins vegar. Ég og mín skoðanasystkini vöruðum hins vegar við því að fjármálakerfið yrði einkavætt á einu bretti í okkar litla hagkerfi vegna þess að sú hætta blasti við að þeir sem hafa eignarhald á atvinnustarfseminni í landinu myndu jafnframt eignast bankana. Þeir sætu beggja vegna borðs og ættu fyrirtækin sem síðan leituðu til sama aðila um lánsfjármagn. Þetta varð þróunin...

...Ég orðaði einhvern tíma þá hugsun að ef ég stæði frammi fyrir því að senda annaðhvort þotuliðið úr landi eða íslenska jafnaðarmannasamfélagið þá myndi ég frekar vilja að þotumannskapurinn hefði sig á brott. Þá fékk ég það til baka að ég vildi alla bankastarfsemi úr landi. Það er af og frá. Ég vildi úr landi þann hugsunarhátt græðginnar sem leitt hefur til geigvænlegrar misskiptingar í samfélaginu. Ég er fylgismaður þess að við rekum hér öfluga, trausta og góða viðskiptabanka og er alls ekki andvígur því að til séu fjárfestingarsjóðir. En ég vil hafa skýr greinarmörk þarna á milli. Eins og stendur eru íslensku bankarnir að langstærstum hluta fjárfestingarsjóðir, sem róa lífróður. Þeir geta ekki sinnt viðskiptabankahlutverki sínu og soga til sín allan gjaldeyri til að standa skil á eigin skuldum. Staðan í banka- og gjaldeyrismálum er svo myrk í augnablikinu, þokan mikil, sögusagnirnar margar. Það þarf að rannsaka gjaldeyrisviðskiptin þegar í stað. Íslenskir fjármálamenn þurfa að fá tækifæri til að afsanna þann áburð að þeir séu að vinna að veikingu krónunnar...

...Umræðan um evruna er allt of einfölduð enda þjónar slíkt tilteknum valdahagsmunum. Tökum dæmi. Hérlendis hefur hingað til verið sátt um að það sé forgangsverkefni að halda fullri atvinnu. Á evrusvæðinu má segja að atvinnuleysi sé nánast notað sem hagstjórnartæki. Þar er langtum meira atvinnuleysi en hér. Viljum við slíkt?...

...Það er þreytandi að horfa upp á vanhugsaðar hugmyndir keyrðar í gegn með offorsi. Mér finnst hins vegar ekki erfitt að lúta tímabundið í lægra haldi. Ég er vanur því að eiga við fólk og virði leikreglur lýðræðisins. Ef ég verð undir eftir átök og upplýsta umræðu þá verð ég að taka því. Ég held áfram og gefst ekki upp. Mér finnst hins vegar óþolandi þegar upplýst umræða fær aldrei að eiga sér stað. Það gerist iðulega þegar við trúmenn markaðshyggjunnar er að glíma. Þeir horfa fjarrænum augum út í loftið og segja: Þetta er best komið í höndum markaðarins. Hvort heldur er að baða gamla konu, taka við slösuðum manni á bráðavakt, reka kaffihús eða róa til fiskjar. Sumt á heima á markaði og sumt ekki. En það er ekki hægt að tala við ofsatrúarfólk. Það horfir framhjá manni og endurtekur trúarjátninguna. Ef maður meðtekur ekki fagnaðarerindið þá er maður vantrúaður. Á móti öllu. Stalínisti. Í svona ástandi er erfitt að halda uppi upplýstri umræðu...

...Ef einhver stendur í þeirri trú að ég vilji kyrrstöðu þá er það misskilningur. Ég vil kraft og líf á öllum sviðum þjóðlífsins, endurnýjun og nýsköpun. Ég er fylgjandi margbreytileikanum og vara við einsleitninni. Með einkavæðingu og markaðsvæingu er því miður verið að keyra okkur inn í slíkan farveg. Gildismat okkur verður að vera byggt á heilbrigðum og sanngjörnum grunni til frambúðar. Jöfnuði og jafnrétti má aldrei aftur fórna á altari græðgi, spákaupmennsku og auðkýfingadýrkunar...

Viðtalið er sem fyrr segir miklu ítarlegra en hér er hægt að gera skil og kemur víða við, hér er bara tæpt á örfáum atriðum...

Takk!

Athugasemdir

[persóna (IP-tala skráð) 20.9.2008 kl. 21:08]

Ég veit kanski ekki mikið um þetta en þykir samt svona umræða áhugaverð, kanski af því ég fæ svo mikið af spurningum upp í hugan sem fær mig til að hugsa. Sjálfur var ég alin upp við svona skoðanir eins og þessi Ögmundur fer með, um allt óréttlætið og ríkafólkið (sem Ögmundur kallar að ég held "þotulið") og græðgi þeirra.

Er hann ekki gráðugur? Hvaða misskiptingu er hann að tala um? Hefur hann ekki nóg vill hann meira og hvað hefur fólk meira en bara það sem það hefur skaffað sér lítið eða mikið, er það ekki í samræmi við það sem hver og einn ákveður að eignast?

Er ekki hann að skapa þetta "þotulið" og "óréttlætið"? Ég sé ekkert þotulið bara fólk sem hefur orðið ríkt og er upptekið af því að viðhalda sýnum ríkdóm ég sé ekkert réttlætti og því ekkert óréttlæti heldur, bara afleiðingar af ákvörðunum sem fólk tekur á hverjum degi og hann er kanski ekki svo sáttur við sýnar og þá er gott að geta bent á einhvern.

He he bara smá pæling

                                                             Takk fyrir að lesa kveðja persóna.

[Gunnsteinn Gunnarsson (IP-tala skráð) 20.9.2008 kl. 21:23]

Afskaplega gott viðtal, og sýnir eldhugann Ögmund í réttu ljósi. Ég er ánægður með að Kolbrún Bergþórs skuli þarna hafa risið upp úr lágkúrunni, sem hún sýndi einatt á 24 stundum með daðri við nýfrjálshyggjuríkisspenakapítalista. 

[Jóhannes Ragnarsson, 20.9.2008 kl. 23:25]

Getur hugsast að ofangreind ,,persóna" sé ekki bara venjuleg persóna heldur nýfjálshyggjupersóna? Mér finnst ég kannast eitthvað við hugsunarháttinn sem kemur fram hjá hinni pælandi ,,persónu"

[Sigurlaug B. Gröndal, 21.9.2008 kl. 22:38]

Heil og sæl Guðfríður. Ég las einmitt þetta viðtal og mér finnst það frábært! Það er nefnilega það sem varð fjármálaheiminum að falli, það var græðgi og ekkert annað. Þetta er komið út yfir öll venjuleg viðskipti. Bendi á nýjan bloggara á síðunni minni  "leitandinn". Það er faðir minn Páll Gröndal sem hefur búið í USA í 27 ár og þekkir vel af eigin raun hið markaðsvædda heilbrigðiskerfi sem þar er. Hann hefur mjög miklar áhyggjur af þróun mála hér svo ekki sé meira sagt. Hann mun setja inn pistla og fleira um staðreyndir málsins og hvað sé raunverulega að gerast úti.  Hvet þig sem og aðra sem vilja verja velferðarkerfið að lesa bloggið hans. Kær kveðja frá flokksystir í Þorlákshöfn.