Vinir í Vin

Mínir góðu félagar í Vin og Hróknum gáfu mér óvænta gjöf með fallegu afmælisskákmóti í dag. Forseti Skáksambandsins og forseti Hróksins sjást þarna í miklum ham. Eftir æsispennandi og dramatíska skák féllum við bæði á tíma og jafnteli var því niðurstaðan. Mjög við hæfi. Óli lét sig einhverra hluta vegna vanta, veit ekki hvers vegna.

Vin = hagi, engi; gróinn blettur í eyðimörk; athvarf fyrir fólk með geðraskanir rekið af Rauða krossi Íslands;

Markmiðið er að rjúfa félagslega einangrun, draga úr endurinnlögnum á geðdeildir, efla þekkingu okkar og annara á málefnum geðsjúkra og skapa umhverfi þar sem gagnkvæm virðing og traust ríkir og tekið er tillit til hvers og eins...

Það er gott að koma í Vin. Gott starfsfólk, góðir gestir. Og nóg af skák. Þar var ég einmitt að tefla í dag.

Af sínum alkunna og óbilandi eldhug blés Hrafn Jökulsson og Hrókurinn til sóknar í skákstarfi Vinjar fyrir nokkrum árum. Það er unun að sjá jákvæðan árangur af því starfi og virka þátttöku ólíks fólks sem er á mismunandi stað í lífinu. Gagnrýnin hugsun er byltingarkenndasta afl heimsins. Ef hún dreifist sem víðast - ásamt góðum slurki af alúð, hlýju og mannkærleika - þá getur allt gerst. Raunverulega.

Já, mér er alveg sama þótt ég sé væmin, þannig er það! Höldum áfram að tefla og virkja hugann...!

Ásamt þeim Hróksmönnum heldur Arnar Valgeirsson og fleira gott fólk í Vin utan um skákstarfið af alúð... og alltof margir eru orðnir liprir og skeinuhættir andstæðingar við skákborðið. Og það er einmitt þá sem er skemmtilegast. Takk kæru félagar fyrir skemmtilegt mót. Áfram Vin!

Athugasemdir

[arnar valgeirsson, 16.1.2007 kl. 10:52]

Stórmeistarinn Henrik Dan og verðandi stórmeistari Elsa Maria Þorfinns fylgjast með látunum í ykkur. Þarna eruð þið reyndar bæði fallin á tíma og hvorugt tekur eftir því! Áttuð svosem bæði skilið eitthvað út úr þessari skák, enda bévuð læti og klukkan í stórhættu. En fallegur pistill og skemmtilegt mót með alltof sterku skákfólki, fyrir suma. Við skorum á Ólaf síðar, kannski þegar hann á afmæli???

[Ágúst Dalkvist, 16.1.2007 kl. 14:05]

Til hamingju með 35 árin og með skákmótið sem var haldið í því tilefni og síðast en ekki síst til hamingju með sigurinn á mótinu

[Guðfríður Lilja, 16.1.2007 kl. 15:36]

Sælir! Takk fyrir góðar kveðjur. Ég sé annars staðar Ágúst að þú ætlir kannski að fara að rifja upp mannganginn og góða takta við skákborðið. Vertu þá velkominn á skákmótin í Vin í framtíðinni - og víðar! Lilja