Gjöfin málefnalega

Ég get ekki látið hjá líða að birta eftirfarandi lista yfir rök gegn stækkun álversins í Straumsvík sem var afhentur fulltrúum Alcan í gær, um leið og gjöfinni með Bó var skilað. Listinn er innlegg hins öfluga þverpólitíska hóps Sólar í Straumi - og gjöf til Alcan.

1. Loftmengun
Frábær árangur í baráttunni við loftmengun í Straumsvík síðustu 20 árin verður að engu við stækkun.

2. Sjónmengun
Lóðin eftir stækkun verður jafn breið og hún er löng í dag. Línumannvirki vegna stækkunar á útivistarsvæði Hafnfirðinga og í nágrenni við íbúabyggð eru óásættanleg.

3. Mengunarsvæði
Byggingarland okkar Hafnfirðinga er takmarkað. Í framtíðinni þurfum við að fá Straumsvíkursvæðið og 10 ferkílómetra mengunarsvæði álverkssmiðjunnar undir blandaða íbúðabyggð, iðnað, verslun og þjónustu. Með því að stækka álbræðsluna núna eyðileggjum við framtíðartækifæri okkar.

4. Samfélagsmál
Við erum ekki lengur fátækur útgerðarbær, við búum ekki við atvinnuleysi, við eigum ekki ótakmarkað land og við reiknum ekki með að börnin okkar vilji vinna í álbræðslu. Við erfum ekki landið frá foreldrum okkar, við fáum það að láni hjá börnunum okkar.

5. Fjármál
Allt byggt land í Hafnarfirði í dag er 12 ferkílómetrar. Við stækkun skuldbindum við 10 ferkílómetra byggingarlands undir mengunarsvæði um ókomna framtíð. Í stækkunarhugmyndunum er ekki gert ráð fyrir krónu til okkar Hafnfirðinga fyrir þessa fórn. Óljós loforð um greiðslur fyrir fasteignagjöld og hafnarnotkun koma ekki í staðin fyrir hana.

6. Atvinnumál
Stækkun álbræðslunnar hefur engin úrslitaáhrif fyrir atvinnulíf í Hafnarfirði. Í dag vinna 230 Hafnfirðingar hjá álverkssmiðjunni . Í Hafnarfirði hefur störfum fjölgað undanfarin 7 ár um 240 störf á ári án þess að álbræðslan í Straumsvík hafi stækkað.

7. Virkjunarmál
Stækkun kallar á virkjun neðri hluta Þjórsár og hefur óafturkræfar afleiðingar fyrir náttúru Íslands.

8. Byggðaþróun
Innan fárra ára verður Straumsvíkursvæðið eitt það verðmætasta á höfuðborgarsvæðinu með tilliti til staðsetningar. Nágrenni við höfuðborgina og nágrenni við alþjóðaflugvöllinn gerir þetta landssvæði eftirsóknarvert fyrir hátækni- og sprotafyrirtæki. Mengunarsvæðið takmarkar eðlilega byggðaþróun í Hafnarfirði.

9. Ábati fyrir íslenskt samfélag
"Jafnvel þó að Íslendingar kæmust í hóp stærstu álframleiðenda heims og myndu virkja alla hagkvæmustu virkjunarkosti landsins, myndi arðsemi þess og hagur fyrir íslenskt samfélag aldrei verða meiri en sem nemur framlagi eins öflugs útrásarfyrirtækis” (Ágúst Guðmundsson, Bakkavör, febrúar 2006).

10. Loftslagsbreytingar
Í starfsleyfinu er engin takmörkun á útblæstri gróðurhúsaloftegunda sem valda loftlagsbreytingum sem eru alvarlegasta umhverfisvandamál í heiminum í dag.

Þetta var gjöfin til Alcan frá Sól í Straumi. Þetta er brýn gjöf fyrir bjartari framtíð. Hver eru rök Alcan fyrir stækkun þegar öllu er á botninn hvolft? Rök þeirra eru þau sömu og rök allra alþjóðlegra stórfyrirtækja: krafan um eiginn gróða. Ef við ímyndum okkur að Alcan sé að stækka við sig af gjafmildri góðgerðastarfsemi fyrir Hafnarfjörð eða Ísland, þá erum við sannarlega týnd í skóginum.

Athugasemdir

[Agný, 29.12.2006 kl. 21:37]

Ansi oft sjúm við ekki skóginn fyrir trjám..En held að trjám muni ekki fjölga við það að "planta" álverum meira en orðið er hér á landi...Held þá að það færi að verða við hæfi að skíra Ísland upp á nýtt sem "Ál" land..  Við íslendingar erum má segja 50 árum á eftir öðrum Evrópu löndum í sambandi við það hvenær við duttum inn í "iðnbyltinguna".. Ja nema kanski þau lönd sem flokkast til A- Evrópu.. Mér finnst persónulega engan veginn við hæfi að kalla Ísland "hreint land fagurt land" og planta svo álverum  í hvern fjörð.. Hefði kanski átt að skrifa þetta á mitt blog en..

[Eiríkur Ingvarsson (IP-tala skráð) 30.12.2006 kl. 01:08]

Sæl Guðfríður Ég hef nú fylgst með þinni vefsíðu um skeið. Sér í lagi þar sem mér finnst loks einstaklingur komin fram sem getur verið frambærilegur frambjóðandi fyrir ykkur V græna. Er það með eindæmum að atvinnu kverulantar og neikvæðis postular hafi raðast í ykkar forustu sveit. Eiga þeir það allir sameiginlegt að vera kallmenn. Skrítið.Fannst mér eitt andartak eins og ferskir vindar með lúkufylli af skinsemi fylgdu þér. Ég vona að svo sé. Mér finnst ekki rétt að setja Boðorðin upp með þessum hætti án skýringa.1.      Vissulega hefur náðst góður árangur varðandi loftmengun á síðustu 20 árum. Hver eru rökin fyrir því að sá árangur varðandi loftmengun verði að engu. Einungis er slegið fram fyrirsögn sem duga ekki hugsandi fólki. 1967 var stríðs fyrirsögn í Alþíðublaðinu um að öll byggð í Hafnarfirði legðist af innan fárra ára vegna mengunar. Staðreyndin er sú að byggð hefur aldrei verið blómlegri en nú og mengun stenst alla staðla opinbera stofnana. Það er ekkert í spilunum sem sýna annað en að stækkun standist alla staðla. Því er rangt að halda því fram og dreifa því á sinni heimasíðu að annað sé uppá teningnum2.      Ég get tekið undir sjónamið um sjónmengun. Sjónmengun er fylgifiskur allra framkvæmda og framfara hvort það sé áveituskurður bænda eða akvega um sveitir. Sjónmengun er um allt í Hafnarfirði og nú er verið að skemma mitt útivistasvæði höfnina með framkvæmdum. Ég hef ekkert með það að segja því þarna er einfaldlaga um framför að ræða. Svæðið í kringum álverið er ekki útivistasvæði og ber ekki að kalla það slíkt. Þarna allt um kring er iðnaður af öllum gerðum hvort sem er. Sjónmengun er minnst á þessu svæði að mínu mati og fórnarkostnaðurinn því minnstur.3.      Hafnarfjörður þarf að taka þátt í því að kaupa land. Það er ekki til neins að horfa á núverandi stöðu. Bæjarstjórn þarf að vera virk í því að vinna land. Af nóg er að taka bæði fyrir vestan sveitafélagið sem og sunnan. Við sjáum hvernig bæði Reykjavík og Kópavogur hafa náð að stækka sín lönd.4.      Hver er framtíð atvinnu í Hafnarfirði þegar svo til öll frumvinnsla er farin. Enda okkar börn á því að þjóna hvert öður og varveita arfinn okkar. Hafnarfjörður er glæsilegur bær vegna atvinnulífs og sterkrar stöðu iðnaðar. Það er ekki rétt að mínu mati að gera okkar börnum upp hugsanir um hvað þau vilja vinna í framtíðinni. 5.      Ég vísa til 3 liðs varðandi að kaupa land. Varðandi þessa 10 ferkílómetra þá ber að spyrja hvað eru þessir kílómetrar að gefa bænum í dag í krónum og aurum? Eðlilegt er að greiða fyrir þetta land síðan verður ekki hjá því komist að greiða önnur gjöld. Er það rógur að gefa í skin að ekki standi til að gera annað. 6.      Það er rétt að störfum hefur ekki fjölgað í álverinu. En hvað með fjölgun starfa vegna úthýsingar á verkefnum. Hvers vegna er það ekki tínt til. Hvað hefur Vélaverkstæði Hjalta ehf. bætt við mörgum mönnum í vinnu vegna þessara úthýsinga. Eða Bætir ehf., Vélrás ehf., Blikkhella ehf., og svo mætti áfram telja. Hvaða feimnismál er það að tala um öll störf í iðnaði sem hafa skapast á síðustu 7 árum. Hér verðum við að passa okkur á því að fara með staðareindir en vaða ekki reyk slagorða. Hér er þú að setja á þína síðu grímulausan hernað sem missir marks vegna staðreyndarfælni umhverfisverndarsinna.  Það hef ég ekki séð áður frá þér.7.      Mér finnst rök Ómars Ragnarsonar eiga við 7 boðorðið. Hér er um snortið land að ræða. Sundurgrafið af skurðum og vegum, þverað af síma og rafmangsstaurum. Allar þær framkvæmdir sem hafa verið gerðar þegar á landinu eru með sömu rökum óafturkræft. Þessar framkvæmdir voru gerðar af bændum og landeigendum án athugasemda. Hér eru umhverfisverndarsinnar að leggjast á sveif með þeim sem vilja pressa upp verðið á landinu sínu. Og verða því leikstólpar í því þrefi. Menn sem hafa grafið og sprengt upp sitt land með góðri samvisku en fá svo allt í einu myljandi samvisku fyrir landinu þegar á að virkja, hljóma ekki trúverðugir. Náttúruverndarsamtök eða stjórnmálaflokkar sem falla  fyrir jafn ódýrum rökum geta ekki ætlast til að láta taka sig alvarlega. 8.      Innan fárra ára.... hver segir þetta. Er einhver fræðingur með gáfnafar í lagi sem er til í að skrifa undir þetta. Aftur innan tóm slagorð. Við erum að tala um land frá Straumi til Njarðvíkur. Ég sé ekki takmörkunina. Hér þurfa menn að spýta í og gera tilboð í eignarlönd eða gera eignarnám til Njarðvíkur eða svo. Hér vantar alla framíðar hugsun og framtíðar sýn. 9.      Þetta er skoðun sem á rétt á sér en Ágúst er bara maður að holdi og blóði. Hann sér hvað hann er að gera og þekkir það vel. Ég veit ekki af hvaða meiði þessi skoðun er sprottin en hún er ekki vandlega reiknuð. Hvað eru mörg sprota fyrirtæki sem hafa farið á kollin? Hefur eitthvað álver farið á höfuðið hér á landi? Nei svo er ekki hér er ekki um nokkurra ára flugeldasýningu að ræða, hér hefur verið áliðnaður um áratuga skeið án áfalla. 10.  Það er ekki útgefið starfsleifi heldur aðeins drög af starfsleifi. Því er ekki rétt að setja þetta upp með þessum hætti. Við höfum okkar skuldbindingar þar og ber ekki að bera annað á torg fyrir almenning.   Gjöf Sólar í Straumi er í besta falli ódýrt lýðskrum. Hafnarfjörður hefur stórgrætt á Alcan um leið og Alcan hefur rekið sitt fyrirtæki með prýði.  Það er mín ósk að þú takir upp hanskann og leiðir vitræna baráttu gegn stækkunaráform Alcan og látir þetta ekki í hendur á röklausum væringjum.  Mínar bestu kveðjur

Eiríkur Ingvarsson

660 8000     

[Guðfríður Lilja (IP-tala skráð) 8.1.2007 kl. 01:01]

Sæll Eiríkur.

Gleðilegt ár. Þakka þér fyrir þína löngu og greinargóðu athugasemd. Ég biðst afsökunar á að hafa ekki svarað fyrr - það hefur verið mjög mikið að gera og þetta fórst því miður fyrir í öllum asanum! Ég var fyrr í kvöld að svara röð athugasemda sem ég fékk við síðustu færslu minni um þetta mál - sjá hér. Ég er sammála þér um það að það ríður á að umræða um þessi mál sé á sem flestum vígstöðvum, málefnaleg í hvívetna og einkennist ekki af lýðskrumi eða innantómum slagorðum. Slíkt er hægara sagt en gert. Því miður er það svo í okkar samfélagi þar sem hraði, spenna og auglýsingaslagorð ráða ríkjum að ítarleg umfjöllun um veigamikil málefni fær æ minna pláss. Keppst er við að nota æ stærri upphrópanir til að ná athygli fólks í öllu áreitinu. Texti um flókin og stór málefni er afdráttarlaust dæmdur "of langur" ef farið er út í flóknari spurningar, og sú röksemd notuð að fólk nenni ekki að lesa langt og ítarlegt mál; 20-30 sekúndur til að svara stórum spurningum í sjónvarpi telst "langur tími í sjónvarpi" og svo mætti áfram telja. Þegar ég hef verið með blogg í lengra lagi hef ég undantekningarlaust fengið ábendingar um að það sé miklu betra að þau séu styttri - annars nenni enginn að lesa! Í bloggi er þá ef til vill best að reyna bara að velta upp hlutum á stuttan og kjarnyrtan hátt sem skilja eftir einhverjar spurningar og frekari umhugsunarefni, efasemdir sem annað. Byrjunarleikurinn á öllum sviðum í nútímaumhverfi hraða og slagorða hlýtur hins vegar að vera að fá með einum eða öðrum hætti sem allra flesta til að vakna til umhugsunar um málin og að við reynum í framhaldi af upphrópunum - hvert og eitt eftir megni - að kynna okkur málin sem best, frá sem flestum sjónarhornum. Mér þykir mjög áhugavert að lesa mótrök þín við þeim 10 rökum sem færð voru Alcan eftir Bó-gjöfina - og ég vil við betra tækifæri fá að svara með ítarlegri hætti. Ég er ósammála þér um að þeir ólíku félagar í Sól í straumi hafi með þessari gjöf gert sig seka um ódýrt lýðskrum. Upplýsingafulltrúi Alcan færði fram 10 rök fyrir því á sínum tíma hvers vegna stækkun væri góð fyrir Hafnarfjörð; það er eðlilegt að fulltrúar úr röðum íbúa sjálfra gefi Alcan til baka nokkuð sem þeir telja vera 10 röksemdir gegn stækkun - og tjái sig um það sem þau álíta neikvæðar hliðar stækkunar. Þar hafa þeir ýmislegt sér til stuðnings sem fylla röksemdirnar innihaldi. Eins og þú segir réttilega þarf í raun mjög langt mál um hverja og eina röksemd til að innihald hennar skýrist í sem víðustu samhengi - með og á móti. Augljóslega eru rök á báða bóga - bæði með og á móti stækkun - og á endanum snýst þetta einnig um hvaða framtíðarsýn við  höfum fyrir svæðið allt, og þá stefnu sem taka skal til framtíðar á mismunandi sviðum mannlífsins. Ég er í hópi þeirra sem á margvíslegum forsendum er sannfærð um að það sé framtíð Hafnarfjarðar (og fleiri staða landsins!) fyrir bestu að segja nei við frekari álvæðingu - og að til lengri tíma litið sé það mannlífinu jafnt sem umhverfinu heillavænlegra.

Ég ætla ekki að hafa þetta lengra hér í bili en mun koma aftur að þessu öllu saman í náinni framtíð!

Takk aftur fyrir ítarlega og ígrundaða athugasemd.

Kveðja,

Lilja