Lærið að tefla - í dag!

Byltingarkenndasta afl heimsins er gagnrýnin hugsun. Af henni er aldrei nóg.

Þessa hugsun vakna ég upp við í dag þegar einn af stærri viðburðum skáklífsins fyrir jól er handan hornsins. Úrslitaeinvígið í Atskákmóti Íslands fer fram kl. 13.00 í sjónvarpssal í dag. Ég hvet ykkur öll til að fylgjast með og læra að tefla! Alþjóðlegu meistararnir Arnar Gunnarsson og Bragi Þorfinnsson leiða saman hesta sína, en þeir tveir eru meðal þeirra hæfileikaríku ungu meistara okkar sem landið erfa...

Hrafnkell Kristjánsson íþróttafréttamaður mun sjá um útsendinguna og hafa til liðs við sig Helga Ólafsson stórmeistara og mig. Eigum við ekki núorðið bara að titla mig eina af efnilegri skákkonum Vinstrigrænna?!

Ég var annars að vonast til að fá að skora Þorgerði Katrínu á hólm í einni skák - helst í beinni hjá RÚV. Leggja RÚV undir. Ég gæti vel hugsað mér að vinna þá skák.

Ég verð annars í "bloggfríi" fram á mánudag og mæti þá aftur galvösk til leiks.

Í millitíðinni legg ég fram annað ljóð. Þetta er heldur eldra og meira "gamaldags" en hin, en ég vitnaði í það um daginn þegar ég var spurð hvort einhver von væri til raunverulegra breytinga í heiminum. Það er alltaf von. Og jafnvel þótt við töpum þá er "afrek í ósigrum lífsins" aldrei tilgangslaust... eins og skáldið sagði:

Þú átt að vernda og verja

þótt virðist það ekki fært

allt sem er hug þínum heilagt

og hjarta þínu kært

 

Vonlaust getur það verið

þótt vörn þín sé djörf og traust

en afrek í ósigrum lífsins

er aldrei tilgangslaust.

 

Athugasemdir

[http://svartfugl.blogspot.com/ (IP-tala skráð) 9.12.2006 kl. 15:56]

Flott ljóð. Hver er skáldið?

kv

Anna B.M. 

[kókó (IP-tala skráð) 13.12.2006 kl. 12:23]

Er það ekki bloggari sjálf?

[kókó (IP-tala skráð) 13.12.2006 kl. 12:27]

Fyrirspurn til Guðfríðar Lilju: Ég reyndi mikið fyrir 2mur árum að fá upplýsingar um skákkennslu fyrir börn. Endaði á að mæta í tíma hjá Hróknum þar sem stóð danskur stórmeistari og talað dönsku og það var svo þýtt. Börn að hlusta á fyrirlestur án þess að hafa taflborð fyrir framan sig. Það var ekki að virka á mitt barn.

Hvar er hægt að fá kennslu fyrir 8 ára barn?

[Guðfríður Lilja, 14.12.2006 kl. 16:30]

Sæll óskráður Kókó!

Ég vona að þetta virki, ég sé ekki netfang hjá þér svo ég vona að þetta svari þér hér. Sendu mér annars endilega netfang og ég get svarað þér betur! Ef þú ert að leita að skákkennslu fyrir 8 ára barn þá mæli ég m.a. með byrjendanámskeiði við Skákskóla Íslands í Faxafeni 12. Nýtt námskeið byrjar eftir áramót (hringdu í síma 568 9141 í byrjun janúar fyrir frekari upplýsingar!). Bkv Lilja