FIRRING, EKKI MISTÖK

Stuðningur ríkisstjórnar Íslands við innrásina í Írak var byggður á
blindri hlýðni við hernaðarstefnu Bush, ekki á "röngum
upplýsingum".

Stuðningur ríkisstjórnar Íslands við innrásina í Írak var byggður á
siðleysi Íslands í alþjóðasamfélaginu, ekki ákvarðanaferli sem var
"ábótavant".

Stuðningur ríkisstjórnar Íslands við innrásina í Írak var byggður á
firringu, ekki "mistökum".

Þessi stuðningur datt ekki ofan af himnum sísvona. Hann spratt úr
gróskufullum jarðvegi. Hann kom á fullri ferð í andrúmslofti þar sem
talað er um íslenskan her, íslenska "friðargæslu" (í vopnuðum
einkennisbúningum), íslenska leyniþjónustu og íslenska aðild að
Öryggisráði Sameinuðu þjóðanna. Hann kom í andrúmslofti þar sem
embættismenn og stjórnarherrar gera sér stóra drauma um litla Ísland.

Umsókn Íslands í Öryggisráð Sameinuðu þjóðanna sprettur úr þessum jarðvegi. Það er firra sem kostar okkur skattborgarana fáránlegar upphæðir. Að okkur Íslendingum detti í hug að við eigum þangað erindi er byggt á
misskildum mikilmennskudraumórum um herlandið Ísland.

Í stað þess að einblína á það jákvæða og uppbyggilega sem við
Íslendingar getum gefið til alþjóðasamfélagsins, er þessi stefna fædd
af draumum metnaðarfullra embættismanna sem langar að vera stórir í
New York og stjórnarherrum sem langar að vera "alvöru" herþjóð – þjóð
á meðal þjóða í eigin augum.

Að biðjast afsökunar og tala um mistök er gott og gilt í sjálfu sér.

Afstaða til styrjalda byggist hins vegar í grunninn ekki á mistökum
eða röngum upplýsingum. Hún byggist á siðferðisþreki og
grundvallarafstöðu til friðar og lausnar deilumála. Hún byggist á
skýrri sjálfsmynd og hugmyndafræði um hlutverk sjálfstæðrar og friðelskandi smáþjóðar í heiminum.

Í þeim efnum er Ísland á kolrangri braut firringar - hernaðinum í hag.

Athugasemdir

[Anna Benkovic (IP-tala skráð) 28.11.2006 kl. 08:35]

Heyr heyr, skrítið að kalla það "mistök" og rangar upplýsingar að ganga GEGN samþykktum Sameinuðu Þjóðanna og ekki voru allar þjóðir svona illa upplýsta eins og til dæmis Þjóðverjar (sem líka voru með amerískann her í landinu þá).

BILLEGT

[Jón Valur Jensson (IP-tala skráð) 2.12.2006 kl. 00:43]

Gegn HVAÐA samþykktum Sameinuðu þjóðanna?