Eiga geðfatlaðir afturkvæmt?

Að loknum ríkisstjórnarfundi í dag verður ráðherrum afhent ályktun.

Geðhjálp skorar þar á ríkisstjórnina að standa að fullu við loforð um menntunar- og starfsendurhæfingarúrræði fyrir geðfatlaða og heilaskaðaða. Geðhjálp og Fjölmennt hafa í sameiningu gert fjölda fólks kleift að koma aftur út á vinnumarkaðinn eftir langvinn og erfið veikindi.

Í ályktuninni segir meðal annars:

"Það er skýlaus krafa að hið opinbera tryggi lög- og stjórnarskrárbundinn rétt fólks með geðsjúkdóma og heilaskaða til menntunar og fræðslu við hæfi...  Það er óþolandi og óviðunandi að eina sérhæfða náms- og stuðningsúrræðið í landinu fyrir ofangreinda hópa skuli sífellt mæta fordómum af hálfu stjórnvalda."

Ekkert er jafn mikilvægt fyrir geðfatlaða eins og að eiga von um bata. Að vita að maður geti haldið áfram að læra, og fá stuðning og hvatningu til að fara aftur út á vinnumarkaðinn þegar færi gefst. Eiga afturkvæmt.

Þetta er ekki aðeins mikilvægt fyrir viðkomandi einstaklinga, fjölskyldur þeirra, aðstandendur og vini. Þetta er mikilvægt fyrir samfélagið í heild.

Verkefni sem þessi eiga að vera forgangsverkefni á Íslandi í dag. 

Athugasemdir

[Guðrún María Óskarsdóttir., 24.11.2006 kl. 01:42]

Sæl Guðfríður Lilja.

Vertu velkomin í pólítikina.

Ég tek heilshugar undir þessa áskorun sem Geðhjálp fer fram með og það félag hefur lyft Grettistaki á málefnum þeirra sem eiga við geðsjúkdóma að stríða.

Styð heilshugar slíka baráttu.

kv.gmaria.

[Ólafur fannberg, 25.11.2006 kl. 23:32]

ég líka