Að eiga góða granna

Einn minna góðu nágranna á Vesturgötu heitir Lára Hanna. Hún er dugnaðarforkur. Hún vinnur fulla vinnu og ábyggilega miklu meira en það en er um leið eitilhörð baráttukona fyrir betra samfélagi (í öllum sínum frítíma ímynda ég mér!).

Vesturgatan er afskaplega heppin að hún skuli búa einmitt á þeirri götu af því að hún berst með kjafti og klóm fyrir því að hún sé ekki eyðilögð með einhverju rugli - og treystið mér, það er yfirfullt af rugl-hugmyndum hér og allt um kring. Stundum held ég að púkar heimsins geri sér leik að því í hjáverkum að blása fólk yfirfullt af slæmum hugmyndum í skipulagsmálum. Svo sitja púkarnir hjá og hlæja að ruglinu sem kemst til framkvæmda.

Lára Hanna virðist engan áhuga hafa á að fara út í pólitík (lái henni hver sem vill) en hún lætur sig samfélagið varða og tekur virkan þátt í að gera það betra. Hún tekur sjálf til hendinni og tekur til sinna ráða: Einstaklingsframtakið í sinni bestu mynd. Við þurfum fleiri Láru Hönnur!

Mér finnst alltaf jafn broslegt þegar trúboðar frjálshyggjunnar tala með tár í augum um guðdóm þess og dýrð að samfélagið eignist fleiri auðjöfra. Svona svo brauðmolarnir hrökkvi til okkar hinna litla fólksins af leifum einkaþotanna - hvar eru þeir nú, blessaðir molarnir?

Ég vil að við eignumst fleiri Lárur.

Ég er sem sagt að drekka morgunkaffið mitt og horfa út um eldhúsgluggann - og horfi einmitt beint á eldhúsgluggann hennar Láru Hönnu nágranna... Hér eru myndböndin hennar, pistlar, músík og fleira til:

http://larahanna.blog.is/blog/larahanna/

Athugasemdir

[Hlynur Hallsson, 1.7.2008 kl. 09:20]

Fleiri Lárur Hönnur og fleiri Liljur. Þá verður allt betra. Ég er viss um að þær spretta upp á hverjum degi og allar að gera lítil kraftaverk sem skipta máli. Bestu baráttukveðjur,

[Elías Halldór Ágústsson, 1.7.2008 kl. 10:30]

Hér er reyndar frétt um að brauðmolakenningin hafi virkað: http://www.theonion.com/content/news/reaganomics_finally_trickles_down

[Kjartan Pétur Sigurðsson, 1.7.2008 kl. 12:11]

Tek heilshugar undir orð þín varðandi Láru Hönnu.

[Jenný Anna Baldursdóttir, 1.7.2008 kl. 12:38]

Ég hef reyndar borið upp þá ósk með sjálfri mér að það væri hægt að fjölfalda hana Láru Hönnu.  Þú ert ekki slæm sjálf.

Hvað er þetta með Vesturgötuna?

Takk fyrir mig.

[Steinunn Helga Sigurðardóttir, 1.7.2008 kl. 12:42]

til hamingju með að hafa svona frábæra konu sem nágranna ! fugl hvíslaði að mér að þú værir líka frábær !

steina 

[Valgeir Bjarnason, 1.7.2008 kl. 13:21]

Ég er einn af þeim sem fæ andlega næringu frá Láru. Aðdáunarverð baráttukona sem hefur náð árangri. Ég fæ líka heilmikla andlega næringu af því að lesa pistlana þína. Við þurfum fleira fólk af ykkar tagi.

Bestu kveðjur.

[Ég (IP-tala skráð) 1.7.2008 kl. 16:11]

Ha?

[Sigurður Þór Guðjónsson, 1.7.2008 kl. 23:07]

Lára er frábær! Ég hef þekkt hana síðan 1973. Svo ólst ég upp á Vesturgötunni, beint á móti þar sem hún býr núna og get ekki til þess hugsað að gatan verði eyðilögð en óttast það samt.