Skálmholtshraun á fimmtudag

 

Hjónin Daniela og Walter Schmitz hafa stundað hrossarækt að bænum Skálmholtshrauni í Flóa um nokkurt skeið. Þau hafa frá ýmsu að segja varðandi fyrirhugaðar virkjanir í neðri Þjórsá og ætla því að vera með opið hús hjá sér núna á fimmtudaginn 20. sept. kl. 17.00 - 19.00. Þá munu þau segja frá reynslu sinni af undirbúningi fyrirhugaðra Þjórsárvikjana, samskiptum sínum við Landsvirkjun og fleiru...

Allir áhugasamir eru velkomnir.

Fyrir þau sem ekki hafa farið um svæðið sem á að sökkva er tilvalið að skella sér núna áður en dimman tekur völd. Það er fallegt og nærandi að labba meðfram bökkum Þjórsár - og ef þrótt þrýtur að næla sér bara í góðan reiðskjóta í staðinn...

Úr sumargöngu VG á bökkum Þjórsár...

Í reiðtúr á bökkum Þjórsár...

Athugasemdir

[Árni Gunnarsson, 17.9.2007 kl. 23:58]

Þetta er einmitt málið Guðfríður Lilja. Hinsvegar er gildismat mikils hluta þjóðarinnar orðið svo sýkt af hraðskákarofsanum að ekki er annað sýnna en að keppendurnir leiki sig í mát í fáum leikjum.

En sá sem situr á hesti og ferðast um í mildu hauströkkri án þess að skynja nærveru eilífðarinnar er ólæknandi af vondum sjúkdómi. 

[Auður (IP-tala skráð) 18.9.2007 kl. 13:31]

Reiðtúr á bökkum Þjórsár!  Það er m.a. málið.  Þetta er vinsæl sveit meðal hestamanna og góðar reiðleiðir þarna, segja kunnugir.  Nóg er komið af virkjunum í Þjórsá og full ástæða til að láta Urriðafoss í friði.  Nóg er komið af skemmdum á landinu með Kárahnjúkaóskapnaðinum.  Það er mál að linni.  Full ástæða til að hugsa  hlutina í grunninn áður en flanað er áfram með tilheyrandi dólgshætti við náttúru landsins.  Baráttukveðjur