Bolungarvíkin

Rétt náði að skrá hér inn eina færslu og boða bloggara-endurkomu áður en ég svo flaug til Bolungarvíkur á Hraðskákmót Íslands. Þetta var frábær ferð - ótrúlega skemmtilegt mót, höfðinglegar móttökur og alls kyns uppákomur... rúsínan í pylsuendanum var svo að sjá Grím Atlason bæjarstjóra og fleiri góða brillera með hljómsveitinni Grjóthruni í Kjallaranum í gærkvöldi.

Í dag var svo dásamlegt veður og á meðan aðrir spiluðu golf fór ég í langan göngutúr, borðaði ber og dáðist að haustlitunum. Mikið er óheyrilega fallegt á Vestfjörðum.

Ég er svo þreytt eftir helgina að ég læt þetta nægja í bili. Hér fylgir ein mynd frá mótinu - krakkar úr grunnskólanum sýna listir sínar. Ég hef sagt það áður og endurtek það óspart - það er alltaf jafn gaman að fylgjast með krökkum tefla, þau eru snillingar. Ein sjö ára kom með tárin í augunum í upphafi móts af því að hún var svo hrædd um að fá ekki að vera með - hafði gleymt að skrá sig til leiks fyrirfram. Svo stóð hún sig þetta líka vel...

  

Athugasemdir

[Karl Tómasson, 17.9.2007 kl. 00:22]

Var ekki stjörnubjart í Bolungarvík í nótt?

Vonarstjörnur fara víða.

Bestu kveðjur frá Kalla Tomm úr Mosó.

[Sigríður Jósefsdóttir, 17.9.2007 kl. 10:38]

Er flugvöllur þar???

[Grímur (IP-tala skráð) 17.9.2007 kl. 13:44]

Það er allt í Bolungarvík - flugvöllur, golfvöllur og fótboltavöllur. Flugvöllurinn hefur reyndar ekki verið notaður sem slíkur um árabil - en hann er þarna þrátt fyrir að vegurinn skeri hann reyndar í tvennt í dag......