Þorskur

Nú bíða ýmsir á milli vonar og ótta vegna ákvörðunar um þorskaflann næsta ár. Þrátt fyrir augljósan sársauka og grafalvarlegar afleiðingar - afleiðingum sem verður að svara með róttækum og víðfeðmum mótvægisaðgerðum til hjálpar byggðunum í landinu - þá er ekki hægt annað en að fara að ráðgjöf Hafrannsóknarstofnunar, það er mín skoðun, ekki hægt að taka sénsinn.

Þetta er stór ákvörðun og þung, en henni fylgir væntanlega gagnmerk framkvæmdaáætlun um hvernig byggðum landsins verði búnar lífvænlegri og réttlátari aðstæður til framtíðar (nægar eru nefndirnar búnar að vera í gegnum árin, skýrslum skilmerkilega raðað inn í bókaskápinn), hvernig eigi að endurskoða kvótakerfið og hvernig eigi að stórefla (stórstórstórefla vonandi) rannsóknir á lífríki sjávar.

Athugasemdir

[Jóhannes Ragnarsson, 3.7.2007 kl. 12:06]

Ekki hægt að taka sénsinn, segirðu. En hvað með veiðar á loðnu og kolmunna? Hvað með notkun flotvörpu? Eigum við að taka sésinn á þeim vígstöðvum?

Það er held ég ekki til mikils að friða þorskinn ef hann hefur lítið eða ekkert æti.

Hvernig framkvæmdaáætlun vilt þú sjá gagnvart byggðum landsins í tengslum við væntanlegan niðurskurð á þorskafla?

Og að lokum Guðfríður Lilja: hefurðu kynnt þér svokallað kvótakerfi í sjávarútvegi, hvernig það vinnur og hverju það hefur skilað? Já og hvernig menn hafa hagað sér innan þessa magnaða kerfis?