Sól við Urriðafoss og kaffi í Þjórsárdal. Mætum!

Baráttufundur til verndar Þjórsá verður við Urriðafoss núna á sunnudaginn 1. júlí kl. 15:00.

Það er mikilvægt að við mætum - góðkunningjar svæðisins sem aðrir! Þau sem ekki þekkja fossinn nú þegar ættu endilega að kynnast honum og sjá með eigin augum svæðið sem á hugsanlega að sökkva. Það ríður á að sýna baráttu Flóamanna stuðning, en þau búa nú við þungan þrýsting stórfyrirtækja og stjórnvalda um að fórna náttúru landsins (fyrir gsm-samband og malbik). 

Opið hús verður í mynni Þjórsárdals á sunnudaginn frá kl. 13 - 17 í Fagralandi, sumarbústað í landi Haga, þar sem ýmsum náttúruperlum verður sökkt ef virkjanaáform ná fram að ganga - flúðum, eyjum, klettum, og grónu landi. Hjónin Guðbjörg Friðriksdóttir og Sigurður L. Einarsson, ásamt öðrum sumarbústaðaeigendum í landi Haga taka á móti öllum þeim sem vilja sjá hvað í húfi er.

Þetta er upplagður sunnudagsbíltúr fyrir alla fjölskylduna!

Athugasemdir

[Ólafur Unnar Jóhannsson (IP-tala skráð) 30.6.2007 kl. 00:37]

Það er mér óskiljanlegt hvers vegna ekki má virkja Urriðafoss og annað það sem hægt er að virkja í neðri hluta Þjórsár.

1. Þjórsá er margvirkjuð og rennsli hennar í byggð er stýrt allt árið um kring.  Þannig að rennsli hennar er ekki náttúrulegt.

2. Umhverfi árinnar sem fer undir mannvirki og lón er ekki óspillt, langt í frá, heldur hefur búskapur bændanna við ána skilið eftir allskyns varanleg ummerki.  Þannig að ekki er verið að vernda ósnortið land.

3. Sunnlendingar hafa Hvítá sem er eins óspillt og hægt er að búast við í nútíma þjóðfélagi. Er ekki betra að einbeita sér að því að halda henni þannig.

4. Verndunarsinnar tala um að laxagengd spillist við virkjun.  Laxveiði í Þjórsá hefur verið hverfandi svo lengi sem ég man eftir og að ætla að stöðva virkjunina  út frá þeim rökum er að fórna meiri hagsmunum fyrir minni.

Það er í mínum huga alveg morgunljóst að í hvert sinn sem á að virkja á Íslandi, hvort sem er um vatnsaflsvirkjun eða jarðvarma að ræða rísa upp á afturlappirnar náttúruverndarsinnar sem eru á móti. Það er eins og þeir sem eru á móti virkjunum og stóriðju geti ekki sætt sig við að það sé nauðsynlegt að breyta landinu til að framleiða orku. En ég hef ekki hitt þann sem hefur á móti því að það sé ræktuð upp ný tún eða gróðursettur skógur, þó svo að þær aðgerðir breyti ásýnd landsins. Nei, náttúruverndarsinnarnir á Íslandi vilja bara hafa virkjanir og stóriðju einhverstaðar annarsstaðar, helst nógu langt út í heimi þar sem Íslendingar sjá þær ekki, og geta helst gleymt því að það sé til eitthvað sem heitir stóriðja. Mér dettur í hug í þessu sambandi stóra náman í Ingólfsfjallinu sem svo margir eru á móti vegna þess hve mikið líti hún er á landinu. En ef mölin er ekki tekin þarna hvar á þá að taka hana? Enhverstaðar annarsstaðar þar sem sést ekki til frá hringveginum? Eru það ekki náttúruspjöll líka? Og hvað á þá að gera við holuna í fjallinu? Fylla í hana aftur? Nei það er eins með Þjórsá og námuna í Ingólfsfjalli, það er nú þegar búiðað nýta ána það mikið að það er engin ástæða til að hætta því núna.  Þegar búið er að virkja þá breytist áin, það vita allir, en það þarf engin að segja mér áin verði eitthvað verri fyrir það...

[Jóhann Páll Símonarson, 30.6.2007 kl. 12:05]

Heil og sæl Guðfríður Lilja.

Ég vil taka undir með Ólafi. Guðfríður og aðrir öfgasinnar verið þið heima hjá ykkur og rækið garðinn þar sem þið eigið heima. Verið ekkert að skipta ykkur af stöðum sem ykkur varðar ekkert um. Látið fólkið sem þarna býr ráða sínum gjörðum.

Jóhann Páll Símonarson.

[Gísli Bergsveinn Ívarsson, 2.7.2007 kl. 11:59]

Ég er sjaldnast sammála því sem VG vilja gera en tel rétt að þeir og aðrir geti komið sínum sjónarmiðum að.  Þeir mæta þá sem hafa áhuga á því að kynna sér hlutina.

Við búum jú í samfélagi þar sem frjálst er að hafa skoðanir á hlutum en erum ekki barin niður eins og gert er í kommúnistaríkjum.