1. maí

"Ég vann einu sinni í kolanámu heima, á sex klukkustunda vöktum, en vaktin í göngunum er 13 klukkustundir án þess að fá nokkurt hreint loft. Það er viðbjóður."

Þetta segir Feknek Jaroslaw. Kolanámur Póllands eru hátíð miðað við Kárahnjúka Íslands. Jaroslaw þráir að komast heim.

"Ég er búinn að vera veikur í heilan mánuð núna og hóstandi og með andþrengsli allan þann tíma. Ég hef ekki getað unnið eftir að ég veiktist fyrir alvöru, m.a. í höfðinu vegna eiturefna, að því er læknirinn sagði mér. Ég fer vonandi eftir nokkra daga heim til Póllands" segir Szepytiak.

Szepytiak er ótryggður í Póllandi og hefur enga vísa atvinnu, samt þráir hann að komast heim. Hvenær ætli honum batni eftir ferðina til Íslands?

En úps. Það er ástæða til að fagna. Það voru víst bara "fáir tugir" manna sem veiktust en ekki 180. Líklega bara tugur sem veikst hefur "að ráði". Aðstæður eru víst "hráslagalegar", því verður ekki neitað, en úr verður bætt. Líklega er enginn "í hættu eins og er". Og sjúklingalistanum sem var stolið? Hver er að gera veður út af því? Þetta var ekkert viðkvæmt. Bara sjúklingaupplýsingar læknis, tölur. Þeir hefðu svo sem alveg mátt sleppa því að taka listann í leyfisleysi en hva, búið og gert.

Um þetta las ég í blaðinu í morgun 1. maí.

Alveg óþolandi þetta nöldur í okkur öllum og móðursýki, ýkjur og upphlaup.

Vonandi ná Szepytiak og Jaroslaw sér að fullu þegar fram líða stundir (sem og hinir fáu tugirnir sem veiktust, eða voru þeir bara nokkrir, örfáar hræður? Fimm eru farnir og ekkert hefur til þeirra spurst, enda spyr enginn. Allir fegnir að vandamálin hverfi sisvona.). Ætli þeir nái sér? Hverjar eru horfurnar? Kolanámurnar í Póllandi koma betur fram við þessa menn en við.

Þetta er svívirðilegt frá upphafi til enda. Fólk vissi hvað var að gerast en aðhafðist ekki neitt. Það átti að níðast á verkamönnum vegna þess að verkið allt er komið í tímaþröng. Skítt með það þótt heilsan fari hjá Pólverjum.

En ég er víst í liði með öfgafólkinu svo þetta er bara upphlaup. Pólitískt upphlaup. Óþolandi röfl.

Szepytiak, Jaroslaw og hinir sem ná ekki andanum í hóstanum eru hvort eð er á leið úr landi og þá getum við bara gleymt þessu. Látið eins og það hafi í raun aldrei gerst og verið glöð með okkur í góðærinu.

Það er jú einu sinni 1. maí. Frídagur.

Krafan 1. maí að fátækt verði útrýmt á Íslandi

Athugasemdir

[Hlynur Hallsson, 1.5.2007 kl. 07:42]

Gleðilegan baráttudag verkafólks! Bestu kveðjur að norðan,

[Sædís Ósk Harðardóttir, 1.5.2007 kl. 09:43]

Til hamingju með daginn. Góður pistill þetta.

[Anna Benkovic Mikaelsdóttir, 1.5.2007 kl. 10:06]

Til hamingju með daginn!

[Birgitta Jónsdóttir, 1.5.2007 kl. 10:27]

Maður er búinn að heyra af slæmum aðbúnaði erlendu verkamannana frá upphafi og skammarlegt hvernig er tekið á þeirra málum. Það ólgar í manni blóðið af réttlátri reiði... spurning hvað skal gera..? Af hverju er fólki alveg sama þegar svona mannréttindabrot eru framin?

Baráttukveðjur...

[Guðjón Sigþór Jensson, 2.5.2007 kl. 08:49]

Þetta er hreint skelfilegt: að skítugar kolanámur í Austrur Evrópu séu hátíð miðað við vinnustað í iðrum hálendis Austurlands sem var kannski fórnað til að bjarga þessu ítalska fyrirtæki frá gjaldþroti.

Þarna í göngunum er unnið með varhugaverð efni sem ekki hefur komið fram í umræðunni. Margir iðnaðarmenn klannast við Epoxi efni, þessi efni eru í svipuðum áhættuflokki. Svo bætist við loftmengun frá ökutækjum ásamt súrefnisskorti. Er kyn þó keraldið leki og fjöldi veikist.

Svo gerist það að allt í einu er yfirlæknirinn horfinn, læknir sem ekki vildi yfirgefa sjúklinga sína. Fréttir herma að læknirinn sé núna í fríi í Kanada? Fróðlegt væri að vita hvort hann hafi sjálfur ákveðið það eða verið skyndilega sendur í frí til að hann gerði ekki Ítölunum meiri skaða en þegar var orðinn. Og stuldurinn á skýrslunum og skýringarnar: allt er þetta mjög á eina bókina enda  fáum við seint að heyra hina hliðina málsins meðan yfirlæknirinn er einhvers staðar í Kanada, kannski fram yfir kosningar?

Mér finnst vera skítallykt af þessu máli. Mætti biðja um hreina og beina umræðu þar sem öll spil verða lögð á borðið?

Kveðja

Mosi - alias

[Pétur Þorleifsson , 2.5.2007 kl. 09:25]

Guðjón minntist á varhugaverð efni í göngunum.  Þessi fyrirspurn kemur inn á þetta.