Ekki orð um Írak

Ég horfði á meintar stjórnmálaumræður um meint utanríkismál í RÚV í gærkvöldi.

Þar var ekki minnst einu orði á Írak. Það var þagað þunnu hljóði um sum stærstu utanríkismálin í þætti um utanríkismál. Farsi.

Nýlega voru fjögur ár liðin frá innrásinni í Írak. Ástandið þar hefur aldrei verið jafn slæmt. Blóðbaðið og ringulreiðin á sér engin takmörk.

Við Íslendingar hneykslumst gjarnan á því að Bandaríkjamenn hafi kosið yfir sig George Bush sem forseta. Gerum grín að þeim fyrir fáfræði og vílum ekki fyrir okkur að úthúða Bush og þjóðinni sem kaus hann.

En hvað gerum við sjálf?

Hvern nákvæmlega vorum við að styðja með stuðningi okkar við innrásina í Írak? Jú, einmitt téðan Bush. Hann og engan annan. Eins og leppar lögðumst við á skottið á honum og gáfum George Bush óskoraðan stuðning okkar í blóðbaði sem veldur ólýsanlegum mannlegum þjáningum.

Ef slíkt kallar ekki á rauða spjaldið til sitjandi stjórnarflokka, hvað gerir það þá? Hvað þarf til svo að við Íslendingar segjum hingað og ekki lengra? Má allt? Eða líður okkur bara svona vel í skottinu á Bush og erum sátt við okkur sjálf? 

Rauði krossinn segir þjáningar Íraka aukast

Athugasemdir

[Eiður Ragnarsson, 11.4.2007 kl. 12:37]

Stuðningur við stríðið í Írak, er umdeilanlegur, og ákvarðanatakan í kringum það einnig.

En ef þetta er stærsta utanríkismálið í hugum VG þá er alveg ljóst að það er ekki hægt að leggja það á þann ágæta flokk að halda utanum þau mál í framtíðinni.

Hvað með Evrópusambandið? Það er lang stærsta utanríkismálið sem blasir við núna, hvort sem menn eru með eða á móti aðild, þá þarf að kryfja þetta mál til mergjar og taka ákvörðun um umsókn..........

En það er víst alltaf auðveldara að horfa um öxl heldur en að líta fram á veginn.....

[kjerulf (IP-tala skráð) 11.4.2007 kl. 12:48]

1. Það er ekki eins og við höfum farið þarna inn með her og slátrað helling af fólki. Þessi listi staðföstu þjóðanna skiptir okkur í raun ekki miklu máli.

 2. Ég er viss um að vinstri stjórn hefði gert nákvæmlega það sama. Þetta er ekki vinstri-hægri pólitík heldur bandalaga pólitík. Bretar tóku þátt, þar er vinstri stjórn. Þeir gerðu það af því að þeir hafa verið lengi í bandalagi við Bandaríkin. Frakkar voru á móti stríðinu, þar er hægristjórn. Þeir gerðu það af því að þeir hafa lengi verið sú þjóð sem er í mestri andstöðu við Bandaríkin innan NATO.

3. Það er ömurlegt að sjá Vinstri græna reyna að nota þetta mál í innanríkispólitíkinni. Þeir ættu að skammast sín að nota eymd Íraka til að ná fram fleiri prósentum í kosningum.

[Elías Halldór Ágústsson, 11.4.2007 kl. 12:56]

Hvað er umdeilanlegt við stuðninginn við stríðið í Írak? Hvort hann hafi verið siðferðislega ámælisverður? Hvort hann sé dæmi um valdníðslu ríkisstjórnarinnar?

Ég sé ekkert umdeilanlegt hér. Að ræða réttmæti Íraksstríðsins er svipað og að ræða réttmæti barnaníðs.

Auðvitað er skiljanlegt að hinir seku reyni að drepa umræðu um þetta á dreif og dreifa athygli viðstaddra með tali um "að líta fram á veginn."  Spurningin er bara hvort nokkur lætur gabbast lengur til að telja þeim vera treystandi til að taka slíkar ákvarðanir framar.

[Einar Steinn (IP-tala skráð) 11.4.2007 kl. 14:46]

Ef stuðningur Íslands við ólögmætt og siðlaust innrásarstríð er ekki stærsta utanríkismálið, hvað er það þá?

Ekki að ég vilji gera lítið úr umræðunni um Evrópusambandið, en mér þykir þetta all alvarlegra mál. 

George Bush sagði skömmu eftir árásirnar á World Trade Center að "ekki yrði gerður greinamunur á hryðjuverkamönnum og þeim sem hylma yfir þá". Hvað með ríkishryðjuverk og þá sem lýsa stuðningi sínum við þau?  

[Guðfríður Lilja, 11.4.2007 kl. 15:09]

Ég er alls ekki að gera lítið úr umræðum um Evrópumál, þau eiga að sjálfsögðu einnig að vera á oddinum og það er ósanngjarnt að halda því fram að ég sé að vega að því. Það sem gerðist þarna í gær var hins vegar það að þátturinn fór að snúast um Frjálslynda flokksinn í innflytjendamálum og hann fékk að leggja undir sig umræður um utanríkismál með upphrópunum í málefnum innflytjenda. Fjölmiðlar bókstaflega leika í höndunum á Frjálslyndum og falla í allar skólabókagildrurnar í þessum efnum. Við þurfum á vandaðri og ítarlegri umræðu um innflytjendamál að halda, og við þurfum líka á vandaðri og ítarlegri umræðu um utanríkismál að halda. Utanríkisstefna Íslendinga og hvernig við skilgreinum okkar hlutverk í alþjóðasamfélaginu er mun stærra og veigameira mál heldur en að það verði afgreitt með lítilli syrpu um EES og ESB sem snýst síðan upp í einræður fulltrúa Frjálslynda flokksins um innflytjendamál. Það sem gerðist þarna í gær var fyrir neðan allar hellur og ekki í þágu málefnalegrar umræðu, hvorki hvað varðar utanríkismál né málefni innflytjenda á Íslandi.