21. mars og hitt og þetta

Það virðast allar vígvélar allra flokka núna hafa verið kallaðar út SOS til að búa til daglegar árásarhrinur á VG. Það opna ýmsir ekki svo munninn og setja ekki svo staf á blað að þeir hnýti ekki í VG, velti upp einhverri froðu, neikvæðni og grófum rangindum í okkar garð.

Langar okkur til að kjósa fólk sem fer fram með slíkum hætti?

Ég held að flestir sjái í gegnum þetta og kjósi eftir málefnum, styrk og karakter flokka og fólks undanfarinna ára, breyttri samfélagsgerð, heimsmynd og lífssýn, ekki eftir upphrópunum og rangfærslum allt í kring rétt fyrir kosningar. Við skulum því láta okkur þetta í léttu rúmi liggja og snúa okkur að öðru...

21. mars er dálítið merkilegur dagur. Fyrir utan allt annað er dagurinn í dag dagur gegn kynþáttamisrétti og hann er líka dagur ljóðsins.

Ég rakst um daginn á þennan stúf úr ræðu sem Martin Luther King hélt til að mótmæla stríðinu í Víetnam, en fáir gerðu jafn mikið til að umbylta hug okkar til kynþáttamisréttis. Hér segir hann:

"Hin sanna bylting gildismatsins mun fljótlega horfast í augu við misréttið milli hinna ríku og fátæku. Með réttlátri reiði mun hún líta yfir heimshöfin og sjá hvernig vestrænir auðjöfrar fjárfesta í löndum Asíu, Afríku og Suður-Ameríku til þess eins að hlaupa með allan gróðann úr landi. Ekki vottur stendur eftir af betra lífi til handa heimafólkinu og sagt verður: þetta er ranglátt."

Afrísk kunningjakona mín hélt einmitt yfir mér ástríðufulla ræðu nýverið um arðránið sem átt hefur sér stað í heimalandi hennar - og hvernig fólkið sjálft fær ekki að sjá krónu af öllum demöntunum sem hafa verið numdir á brott. Henni líður illa á Íslandi enn sem komið er, finnst veðrið hræðilegt, fólk kuldalegt og hana langar til að vinna við eitthvað annað, en vonandi bætist úr með tímanum þegar vorar... 

Orð Martins Luther King á sínum tíma féllu ekki beinlínis í kramið hjá öllum þótt nú sé hann viðurkenndur sem ein af þjóðhetjum Bandaríkjanna. Fjölmiðlar og fleiri hökkuðu t.d. King í sig fyrir ræðuna gegn stríðinu í Víetnam, þar sem hann kallaði á byltingu í siðferðisvitund þjóðanna.

FBI hleraði King í mörg ár (m.a. hrædd um að hann væri með tengsl við kommúnista) og notaði svo upptökurnar til að reyna að svæla hann frá leiðtogahlutverki sínu í frelsisbaráttu svartra Bandaríkjamanna.

En sem betur fer varð þeim ekki kápan úr því klæðinu...

Það er hins vegar hárrétt sem sagt hefur verið hér í athugasemdum á síðunni, að viðskipta"frelsi" og frelsi manneskjunnar er ekki alltaf eitt og hið sama, og stundum eru þeir sem berjast hvað ötulast fyrir hagsmunum auðhringja undir formerkjum frelsisins sömu mennirnir og standa hvað harðvígast gegn frelsisbaráttu venjulegs fólks og ólíkra hópa samfélagsins.

Frelsi og frelsi er ekki það sama.

Útrýming kynþáttamisréttis og andúðar er mikilvægt skref í átt til frelsis... og vonandi auðnast okkur að vinna sameiginlega að slíku jafnt og þétt næstu árin. Það voru hér góðir viðburðir í tilefni dagsins sem minntu okkur á nauðsyn þess.

Að lokum er hér lítið ljóð í tilefni þess að í dag er alþjóðlegur dagur ljóðsins. Það er eftir Ólöfu Sigurðardóttur frá Hlöðum (1857-1933) og snertir á frelsi og ánauð...

Vont er að láta leiða sig,

leiða og neyða.

Verra að láta veiða sig,

veiða og meiða.

Vont að vera háð,

verst að lifa af náð.

Gott að vera fleyg og fær

frjáls í hverju spori.

Sinnið verður sumarblær,

sálin full af vori.

Athugasemdir

[arnar valgeirsson, 21.3.2007 kl. 23:41]

Rétt hjá þér, Lilja, þegar fólk er hrætt um að missa völdin sér það ekki aðrar leiðir en árásir. Skiptir þá engu hvað er satt og rétt, reynir að bulla sig út úr vandræðum. Jamm, 21. mars er merkilegur, þó ekki sé nema fyrir þær sakir sem þú nefndir. Hef ekki farið á miklar samkundur vegna þess en í gær fór ég á yndislega afríkanska sýningu í Þjóðminjasafninu. Afríkönsk list lýsir ótrúlega flottri tjáningu. Í kvöld var ég á Múltí Kúltí við Ingólfsstræti. Vinir Indlands voru þónokkrir og þarna sýndu stúlkur tælenskan dans. En í mínum huga var aðalatriðið að hlýða á Stefán Herbertsson, hinn mikla leiðtoga og formann Kalak, ausa úr sínum djúpa viskubrunni um sögu og menningu Grænlands. Fór vel yfir landafræðina og var með myndasýningu. Úff, hvað ég er skotinn í Grænlandi.... Sendi eitt lítið ljóð yfir í tilefni dagsins, eftir Pálma Örn Guðmundsson og heitir það máttur ljóðsins:

Aftur og aftur

skal ég yrkja

sama ljóðið

uns það rís upp

og segir

nú get ég

Nú get ég

gefið þér líf

[Sveinn V. Ólafsson (IP-tala skráð) 22.3.2007 kl. 01:09]

Viðskiptafrelsi er mikilvægar en svo að hægt afgreiða það á léttvægan hátt, það er heppilegast að það sé meginregla (principle) eins frelsi almennt.  Við þekkjum söguna sem lýsir fyrir okkur einokunarverslun Dana og afleiðingu þeirra hörmunga. Voana að slíkt endurtakialdrei á þessu ágæta landi okkar.  Það eru til annarsskonar hagkerfi sem byggja á öðrum meginreglum  og kallast eitt þeirra Centrally-Planned Economy eða Command Economy á ensku.

"Centrally-Planned Economy / COMMAND ECONOMY: Economic system in which the means of production are publicly owned and economic activity is controlled by a central authority. Central planners determine the assortment of goods to be produced, allocate raw materials, fix quotas for each enterprise, and set prices. Most communist countries have had command economies; capitalist countries may also adopt such a system during national emergencies (e.g., wartime) in order to mobilize resources quickly."

Hver er stefna VG og hverjar eru þær meginreglur þær sem VG setur fram í tengslu við viðskiptafrelsi?   Er viðskiptafrelsi ekki nátengt frelsi almennt og hluti af persónufrelsi einstaklinga - selja vöru og þjónustu? Er ekki niðurstaðan sú að frelsið er mikilvægast allra meginreglna og það ber ekki að skerða það nema brýna nauðsyn ber til.  Ef við getum orðið sammála um frelsi sem meginreglu erum við samt líkaleg til að hafa ótal skoðanir á því hvenær brýna nauðsyn beri til að skerða frelsið. Þar trúi ég því að VG hafi meira til málanna að leggja og hafi sterkara ímyndunarafl en undirritaður.

 kær kveðja

Sveinn

[halkatla, 22.3.2007 kl. 09:30]

þetta er svo satt - stjórnlaust óöryggi einkennir þessi skrif gegn VG, það getur samt verið sniðugt að lesa þau til að hlæja.

[Steini Briem (IP-tala skráð) 22.3.2007 kl. 10:23]

Það er í anda Björns bónda, dóms og fjallkirkju, að lögleiða hér vændi. Þessi lögleysa finnst honum sniðug. Og skattleggur svo herlegheitin. Það er víða matarholan hjá Sjöllunum, enda þótt þeir séu nú voða mikið á móti því að ríkið sé með nefið ofan í hvers manns koppi. En blautur er nebbinn á Bíbí og er kominn hefðarréttur á þá bleytu alla. Ekki datt honum í hug að gera það bara ólöglegt og refsivert að kaupa hér vændi, sem einfaldast og affarasælast var í málinu. Sænskar leiðir eru svo rosalega sossalegar eitthvað, óálandi og óferjandi öllum bjargráðum. Hér falbjóða erlendar dráttarvélar þjónustu sína nánast daglega á einkamálavefjum og kostar drátturinn 25 þúsund kall. Björn bóndi skattheimtumaður og farísei mætir síðan í dyrunum og innheimtir vaskinn, sem færi nú aldrei í vaskinn, og tekjuskattinn: "Ðö VAT is 6125 krónur, þenk jú verí möts for ðis prógramm, end dónt forgett tú pei ðí inkom tax, gúdbæ!"

Í athugasemdum með frumvarpinu um þetta idiótí segir meðal annars:

"Í öðru lagi er það sjónarmið, sem vegur mun þyngra, að þeir sem hafi viðurværi sitt af sölu kynlífs séu í flestum tilvikum illa settir andlega, líkamlega og félagslega. Þeir séu yfirleitt þolendur sjálfir, t.d. vegna fátæktar, fíkniefnaneyslu eða kynferðislegrar misnotkunar (samkvæmt upplýsingum Stígamóta hafa 65–85% kvenna sem stunda vændi orðið fyrir einhvers konar kynferðislegu ofbeldi)."

[Steini Briem (IP-tala skráð) 22.3.2007 kl. 14:46]

Litið verður til danskra laga þegar kemur að því að heimta skatt af vændi. Með lagabreytingum sem gerðar voru á þingi um helgina varð löglegt að stunda vændi. Því er nauðsynlegt að greiða skatt af slíkri starfsemi. Steinþór Haraldsson, yfirlögfræðingur hjá Ríkisskattstjóra, segir að í Danmörku sé virðisauki af tekjum fólks í vændi um 24 prósent og líklegt að sama stefna verði tekin hér þó enn liggi það ekki ljóst fyrir.

Steinþór bendir á að margt í þessu máli geti verið flókið og bendir á nýlegan danskan dóm þar sem vændiskona fékk hluta af kostnaði við brjóstastækkun endurgreiddan þar sem sýnt þótti að það félli undir rekstrarkostnað.

[Anna Benkovic Mikaelsdóttir, 22.3.2007 kl. 16:03]

Fallegt ljóð og frábær pæling Lilja!

[Skafti Eliasson (IP-tala skráð) 22.3.2007 kl. 16:55]

Hvernig væri að hafa dag með kynþáttajöfnun frekar en gegn kynþáttamisrétti ? áhverju þarf svo oft að vera með neikvæðum formerkjum ?

[Kristján Pétursson, 22.3.2007 kl. 18:10]

Þakka þér kærlega fyrir að lofa okkur að lesa þetta frábæra ljóð Ólafar frá Hlöðum.

Úr einu litlu ljóði,

má lesa svo margt.

Ég finn í hennar sjóði,

að allt er svo bjart. 

[Jóhannes Ragnarsson, 22.3.2007 kl. 19:31]

 Já, það hefur varla farið framhjá neinum, hversu önnum kafinn sem hann annars er, að hinir flokkarnir eru komnir í heilagt stríð gegn VG og skal ekkert til sparað í lygum og rangfærslum. Ég er, því miður, ekki svo viss um, að allir sjái í gegnum sjónhverfingarnar og hroðan - það getur verið svo sorglega auðvelt að gera ósannindi að sannindum í stjórnmálum á stuttum tíma. Þess vegna hvet ég ykkur í VG, að sofna ekki á verðinum, með því að láta framsóknarsorann sem vind um eyru þjóta og hafast ekki að. Ég held, að á þessum tímapunkti og fram að kosningum, verði VG að mæta subbuskap framsóknarflokkanna af einurð og festu, láti þá ekki éta sig niður í níu prósent eins og síðast.