Ungir Íslandsmeistarar

Íslandsmót barna fór fram í gær í Skákhöllinni Faxafeni og ég get ekki látið hjá líða að birta nokkrar myndir af helstu verðlaunahöfum mótsins.

Íslandsmeistari barna 2007 er leiftursnjall Eyjapeyi, Kristófer Gautason, en Taflfélag Vestmannaeyja hefur haldið uppi afar öflugu æskulýðsstarfi undanfarin ár. Félagið hlaut nýverið Fréttapýramída Frétta í Eyjum fyrir framlag sitt til íþrótta og er vel að þeim heiðri komið. Nýi Íslandsmeistarinn frá Vestmannaeyjum er glæsilegur fulltrúi þess góða starfs sem þar hefur farið fram - og einn af mörgum bráðefnilegum ungum skákmönnum sem þar eru að alast upp.

Íslandsmeistari stúlkna varð Hrund Hauksdóttir úr Skákdeild Fjölnis í Grafarvogi (og nemandi í hinum víðfræga skákskóla, Rimaskóla), en Fjölnir og Grafarvogsbúar hafa einmitt líka fætt af sér hvern unga skákmeistarann á fætur öðrum undanfarin ár. Hrund er frábær skákkona og ég hlakka mikið til að fylgjast með þroska hennar og framförum næstu árin - hún er nú þegar byrjuð að safna Íslandsmeistaratitlum. Ef hún heldur áfram eins og hingað til verður hún farin að velta okkur gamlingjunum úr sessi fyrr en varir - ásamt ýmsum aðeins eldri stallsystrum sínum á unglingsaldri sem eru henni góðar fyrirmyndir. Hér eru nokkrar myndir frá mótinu:

 

 

  

Til hamingju krakkar!

Athugasemdir

[arnar valgeirsson, 28.1.2007 kl. 22:26]

Þetta eru stórefnilegir krakkar og gaman að krafturinn sé svona mikill út um allt land. Sé fyrir mér landsmót, Grænland - Ísland næstu árin og heimsmeistara í öllum flokkum bráðum. Síðast er ég tefldi við Hrund þá malaði hún mig, þó hún væri aðallega að fylgjast með næstu borðum! En það er sko engin skömm að tapa fyrir Íslandsmeistara....