Thelma í framboði

Myndin af pabba - Saga Thelmu hreyfir við öllum er lesa. Það þarf mikið hugrekki til að ganga fram fyrir skjöldu og segja sögu sína eins og Thelma gerði. Ég vona að væntanleg kvikmynd verði unnin af jafn mikilli næmni og innsæi og bókin - og hvet alla til að lesa bókina sem ekki hafa þegar látið verða af því. 

Thelma Ásdísardóttir er í framboði. Ég er stolt af því að hún skipar 8. sætið hjá okkur í Kraganum - Suðvesturkjördæmi - og það væri vel við hæfi að rödd hennar hljómaði í þingsölum Alþingis. Það verður að teljast ólíklegt að Thelma komist inn að þessu sinni, en vonandi geta aðrir í fremstu röð látið bergmálið af rödd hennar hljóma og tryggt enn frekari úrbætur, réttaröryggi og aðstoð við fórnarlömb kynferðisofbeldis og misnotkunar. Þar er enn víða pottur brotinn og brýn þörf á nýjum lausnum.

Thelma er Stígamótakona en Stígamót hafa unnið þrekvirki í þessum málum. Mig langar til að ljúka bloggi dagsins með tilvitnun af heimasíðu Stígamóta. Saga Thelmu sannar einmitt að það er hægt að lifa allt af og koma út með reisn og styrk - en hjálp, skilningur, þekking og úrbætur verða að vera til staðar.

Kvennapólitísk viðhorf fela í sér þau megin gildi að líta ekki á þá sem beittir eru kynferðisofbeldi sem varnarlaus fórnarlömb eða sjúka einstaklinga, heldur einstaklinga sem hafa lifað af ógnandi ofbeldi og búa þess vegna yfir miklum styrk. Jafnframt lítum við svo á að viðbrögð einstaklinga við kynferðisofbeldi og afleiðingar þess á líf þeirra séu eðlileg viðbrögð við óeðlilegum aðstæðum. Vinnan á Stígamótum felst því í því að gera einstaklinga meðvitaða um eigin styrk og aðstoða þá við að nota hann til að breyta eigin lífi og að sjá ofbeldið í félagslegu samhengi en ekki sem persónulega vankanta. Jafnframt lítum við svo á að þeir sem hingað leita séu "sérfræðingarnir" það er að segja enginn þekkir betur afleiðingar kynferðisofbeldis en sá sem hefur verið beittur því. Við leitumst því við í starfi okkar að skapa jafnræðistengsl og nánd milli starfskvenna og þeirra sem aðstoðar leita.

Samið um sögu Thelmu

Athugasemdir

[Anna Benkovic Mikaelsdóttir, 27.2.2007 kl. 10:46]

Thelma er alvöruhetja og á allt gott skilið!

[halkatla, 27.2.2007 kl. 11:57]

þetta er vonandi bara byrjunin, mér finnst gott að vita af henni þarna

[Hlynur Hallsson, 27.2.2007 kl. 12:37]

Thelma er hetja og kona ársins ár eftir að ár að mínu mati og kvikmyndin mun vonandi enn auka umræðu um kynferðislegt ofbeldi svo við getum spornað gegn því. Frábært að Thelma skipi sæti á sigurlista Vinstri grænna. Bestu baráttukveðjur og takk fyrir síðast Lilja. Þú ferð á Þing í vor!

[G.Helga Ingadóttir, 27.2.2007 kl. 14:05]

Já hún Telma segir sögu sína af einlægni og raunsæi og fann sína leið til að fyrirgefa, án þess þó að leggja blessun yfir þessa skelfilegu atburði í lífi sínu og systra hennar, ásamt foreldrum sínum.

Þessi saga snerti mig djúpt, en ég tók hana sem skyldulesningu, þegar hún kom út.

Stið Telmu! 

[Sigurður Þór Guðjónsson, 27.2.2007 kl. 20:26]

Það hefur nú komið fyrir að þolendur kynferðislegs ofbeldis hafa einmitt verið afgreiddir sem (geð)sjúklingar opinberlega án þess að Stígamót hafi látið sig það nokkru skipta. Ástæðan? Jú, þeir voru ekki af "réttu" kyni.  

[Anna Benkovic Mikaelsdóttir, 28.2.2007 kl. 20:15]

Ertu að tala af reynslu Kæri Sigurður?  Vonandi ekki!